I dënuar prej 11 vitesh për një plagosje në Greqi, Eraldi me origjinë nga Lezha doli nga burgu në vitin 2021, ndërsa po në atë vit u njoh edhe me Myrveten me origjinë nga Korça nëpërmjet rrjetit social Facebook. Pas daljes nga burgu 35-vjeçari ishte lënë me detyrim paraqitje në komisariat. Në vitin 2022 të dy nisën bashkëjetesën në Tiranë, ndërsa Myrvetja nuk kishte kontakte me familjen e partnerit të saj. Për disa ditë Eraldi nuk u paraqit në komisariat për shkak se ishte në punë. Për këtë arsye ditën që u plagos, pas spitalit menjëherë ai përfundoi pas hekurave. Aktualisht ai ndodhet në burgun e Fierit, ndërsa që ditën kur ndodhi ngjarja Myrvetja nuk ka mundur të flasë apo ta takojë më Eraldin. Shtatzënë dhe me djalin 7 muajsh, 25-vjeçarja po strehohet nga tezja e saj. Pasditen e sotme ajo vjen në ‘Pa Gjurmë’ për të rrëfyer të vërtetën e kësaj ngjarje të rëndë.