Përdorimi i drogës në shkollat e Tiranës nuk është më një ngjarje, por fenomen që ka prekur shumicën e të rinjve. Report Tv shkoi në një nga shkollat e Tiranës, aty ky dy adoleshentë tregojnë me detaje, ku e gjejnë drogën, sa e blejnë atë dhe si konsumohet mes shokëve e shoqeve. Të mërkurën policia goditi një bandë droge, me strukturë shpërndarësish në shkolla dhe lokale nate të Tiranës. 20 persona të moshave të ndryshme u arrestuan, 4 po kërkohen, mes tyre 3 vajza. Anëtarët e grupit kriminal që u arrestuan të mërkurën në Tiranë gjatë operacionit "Harta", që shpërndanin lëndë narkotike kokainë, heroinë dhe kanabis, kishin kodet e tyre të komunikimit për të mos rënë në sy, jo vetëm në komunikimet verbale por edhe në celular. Disa nga kodet që ata përdornin ishin vëllai i madh, vëllai i vogël dhe pluhur zane referuar kokainës apo seqe referuar kanabisit që korrespondojnë me lëndën narkotike që ata shpërndanin. Vëllai i madh dhe vëllai i vogël lidhet me sasinë e kokainës që do të shpërndahej nga personat e përfshirë. Policia dhe prokuroria ka administruar dhjetëra telefonata për të siguruar fillimisht deshifrimin e kodeve dhe më pas sigurimin e provave për veprimtarinë kriminale. Zona kryesore e shpërndarjes, sipas burimeve, ishte rreth e përqark gjimnazit "Petro Nini Luarasi" dhe lokaleve përreth.