Oliver Zenuni djali 26-vjecar, nga Delvina është në kërkim të prindërve të tij biologjik. I përndjekur për të dytën herë nga fati i keq, që ditën kur prindërit e braktisën, sot ka mbetur i vetëm pas ndarjes nga jeta të prindërve birësuar. Oliveri u lind më 13 shtator të vitit 1994 në Maternitetin e Delvinës, nga ku u braktis sapo erdhi në jetë. Ai u rrit në shtëpinë e fëmijës në Vlorë, deri në moshën 5-vjecare kur u birësua nga cifti Muharrem dhe Floresha Zenuni nga Berati. I rritur me shumë dashuri prej tyre, në moshën 16-vjecare zbulon se ishte një djalë i birësuar. Frika se mund t’i lëndonte, nuk e la të kërkonte rrënjët biologjike. Ishte viti 2018 kur babai birësues, ndërron jetë pas një operacioni. Një muaj më pas edhe nëna Floresha u nda nga jeta. I mbetur vetëm, për herë të dytë, i vetmi që iu gjend pranë dhe që e ka mbështetur është miku i tij i ngushtë, Mikeljan Sulillari. Dy shokët jetojnë prej 3 muajve në Tiranë. Pas vdekjes së prindërve birësues, Oliveri vjen në ’Pa Gjurmë’ për të mësuar të vërtetën e jetës së tij.