U largua nga banesa të dielën e datës 5 shkurt, gjendet pas 24 orësh i moshuari nga Delvina, Seit Murto. 67-vjeçari i diagnostikuar me Alzaimer u zhduk në mënyrë të mistershme pa njoftuar askënd, duke alarmuar familjen Mero, e cila prej vitesh kujdeset për të. Pas denoncimit të rastit në emisionin “Pa Gjurmë” mbërritën shumë telefonata të cilat treguan vendndodhje të ndryshme të 67-vjeçarit, deri kur mbrëmjen e djeshme pas shumë kërkimeve në terren, fqinji i tij e gjen në një përrua në periferi të qytetit të Delvinës. Eltoni e shoqëroi Seitin menjëherë në spital e më pas e strehoi në banesën e tij, ndërkohë që dërgoi edhe disa video ku shihet qartë gjendja e 67-vjeçarit. Gjatë bisedës së moderatores Odeta Dume me të riun që kujdeset për Seitin, ky i fundit ishte aty pranë, duke mos nguruar që të flasë ato pak fjalë që I dalin nga shpirti, pas shumë orëve të vështira që kaloi në temperatura të ulëta, pa askënd që të kujdesej për të.