Historia që do të sjellim këtë pasdite është një tjetër dramë njerzore, e cila këtë herë ka sprovuar familjen Mehmeti nga Tirana.Pas ndarjes nga bashkëshorti e vetme me 5 fëmijët e mitur, Liljana Mehmeti vendosi të emigrojë drejt shtetit grek për një jetë më të mirë... pa e ditur se atje do të humbte edhe një pjesë të shpirtit. Liljana me dy djemtë asokohe 9 dhe 2 vjeç dhe me 3 vajzat dy nga të cilat binjake, 7 dhe 4 vjeçe u vendosën në qytetin e Athinës. Ato kalonin netët jashtë nëpër lulishte, ndërsa kërkonin lëmoshë për të mbijetuar... Si të mos mjaftonte kjo, djali i madh i familjes Gëzim Ymeri asokohe nisi të shoqërohej me disa persona që ishin përdorues droge. Pas shumë tentativave të nënës për të larguar të birin 9-vjeçar nga këto persona, ai largohet nga shtëpia ndërsa për dy javë nuk u bë i gjallë... Dy javë të cilat për nënën dhe 4 fëmijët e tjerë do të ishin momente tmerri, ndërsa jetonin mes skamjes dhe zemrës së ngrirë për Gëzimin. Pasi kaluan dy javë, 9-vjeçari kthehet në shtëpi ndërsa e në gjaknxehtësi e sipër nëna e tij e qëllon me shuplakë. Menjëherë ai paraqitet në komisariatin e policisë, ku denoncon nënën e tij për dhunë, ndërsa më pas përfundon në jetimore. E frikësuar, nëna Liljana bashkë me 4 fëmijët e tjerë kthehet në atdhe ndërsa lë pas të birin, Gëzimin. Pas pak muajsh me ndihmën e vëllait të saj, Liljana arrin të lidhet sërish me të birin Gëzimin me të cilin komunikonte me anë të telefonit. Kontaktet i rujtën për disa vite, ndërsa edhe pas shumë tentativave të dajës së Gëzimit për ta marrë këtë të fundit, institucioni nuk e lejoi... Ishte viti 2008, kur Liljana flet në telefon me djalin e saj, Gëzimin asokohe 16 vjeç, ndërsa pas kësaj telefonate ajo nuk do të mund t’ia dëgjonte më zërin.