Ilir Driza 51-vjecari nga Kukësi udhëtoi drejt Gjakovës me një tjetër person, por humbi gjurmët papritur. Nëna kishte parandjenjë të keqe dhe bëri të gjitha tentativat që i biri të mos largohej. Ajo mbylli të gjitha dyert e shtëpisë, që Iliri të mos dilte nga banesa, por ai e gjeti shtegun. U hodh nga dritarja dhe nuk u kthye më. Me Sefer Sadikun me origjinë nga Gjakova, bashkëudhëtarin e rrugës pa kthim i kishte lidhur tregtia e armëve në Ballkan gjatë viteve 96-99. Ai lë djalin e mitur, i cili nuk e njohu kurrë të atin dhe bashkëshorten Ajshien, e cila me ikjen e tij nuk u martua më kurrë. Pak ditë më pas familjarët bënë denoncimin në polici, ku në komisariatin e Gjakovës bashkëshortja u vu përballë personave të ndaluar. Mes tyre ajo njohu mikun e Ilirit me të cilin ai u largua. Gjatë dëshmisë së dhënë para uniformave blu Sefer Sadiku pranoi se kishte udhëtuar më datë 20 gusht të vitit 1997 me Ilirin dhe se ky i fundit kishte hedhur një granatë dore dhe ishte kapur nga policia serbe në kufi. Sipas të njëjtës dëshmi nuk u raportua për humbje jete dhe as shenja gjaku në vendngjarje, ndaj dyshimet e familjarëve janë tek një arrestim i mundshëm. Kërkimet nga familjarët kanë vijuar edhe më pas, pranë policisë së Kosovës, por emri i Ilirit nuk figuron asgjëkundi. Sipas familjes Driza, shtetasi Sefer Sadiku ndodhet pas hekurave në Kosovë, ndërsa nuk kanë mundur më të marrin informacione se çfarë ndodhi mëngjesin e 20 gushtit, me zhdukjen e Ilirit. Nëna që parandjeu fatin e të birit, ndërroi jetë ndërsa djalin që e la 4-vjeç dhe bashkëshortja, ende qëndrojnë me sytë nga dera, me shpresën se Iliri do të shfaqet një ditë.