Guri Hoxha është një 49-vjecar nga Berati i cili humbi kontaktet verën e vitit 2015 nga Madriti i Spanjës. Ai telefonoi për herë të fundit të vëllanë ku i pohoi se ndodhej pikërisht në këtë shtet, ndërsa kishte tentuar të largohej drejt Irlandës. Guri Hoxha ka emigruar që herët në disa shtete, fillimisht në Greqi, Itali dhe Irlandë në vitet 2000. Ende pa krijuar familje ai ka punuar në Irlandë për afro 7 vite, i papajisur me dokumenta të rregullta. Me kthimin e tij në Shqipëri nisi punë në qytetin e lindjes në Berat, ku edhe u martua. Babai i dy fëmijëve vendosi të emigronte sërish, kësaj herë drejt Spanjës. Aty e prisnin disa nga shokët e tij, emrat e të cilëve familjarët nuk ua mësuan kurrë. Viti 2012 e gjen 49-vjecarin në Madrit. Deri në këto momente kontaktet me familjen në Shqipëri i kishte patur të rregullta. Plani i tij ishte të zhvendosej drejt Irlandës, aty ku kishte punuar vite më parë, por ndalohet në kufi dhe kthehet sërish në Spanjë, ku edhe humbi cdo kontakt. Familjarët tentuan të lidheshin me Guri Hoxhën duke e telefonuar në numrin me të cilin ai komunikonte shpesh, por telefoni rezultoi i fikur. Me zhdukjen e 49-vjecarit, bashkëshortja me dy fëmijët 14 dhe 11 vjecare janë larguar. I vetmi që i drejtohet emisionit ’Pa Gjurmë’ është Lutfi Hoxha vëllai i tij.