Ende në kërkim të 82-vjeçarit Agim Çeta nga Tirana i cili doli nga shtëpia mëngjesin e 29 shtatorit dhe nuk u kthye më. E ftuar në studio vajza, Enkeleda Xhaja, bëri thirrje për ndihmë, ndërsa tregoi momentin që babai doli nga banesa dhe gjurmimin që familjarët kanë bërë përgjatë këtyre ditëve. 82-vjeçari prej tre vitesh kurohej nga skleroza dhe gjendja e tij shëndetësore nuk ishte e mire. Agim Çeta jetonte në zonën e Medresesë në Tiranë së bashku me bashkëshorten e tij, ku kjo e fundit kujdesej për shëndetin e të moshuarit. Ditën që u largua 82-vjeçari kishte të veshur një palë pizhame të zeza me kuadrate dhe një bluzë ngjyrë të bardhë me shkronja të kuqe, ndërsa me vete nuk ka marrë asnjë mjet identifikimi. Pak ditë pas humbjes së tij, familjarët mësuan se i moshuari ishte parë në zonën e Freskut në Tiranë, ku menjëherë nisën kërkimet por pa rezultat. Po mesditen e djeshme informacionet që mbërritën gjatë trasnsmetimit live treguan të njëjtën vendndodhje të 82-vjeçarit, i cili lëvizte nëpër rrugicat e Linzës, duke kërkuar ndihmë. Gjatë natës familjarët janë përqëndruar në këtë zonë duke vazhduar kërkimet, kërkime në të cilat kanë marrë pjesë mbi 40 persona përfshirë këtu të afërm dhe banorë të zonës. Gjithashtu edhe paraditen e sotme kërkimet kanë vazhduar, por ende nuk është rënë në gjurmët e të moshuarit.