Thuajse e pamundur për t’u besuar, historia e sotme është një nga ato histori që shkon përtej çdo imagjinate…. Baba i dy fëmijëve, pas vdekjes së të shoqes vendosi të martohet për herë të dytë…por kjo gjë do të ishte fatale për fatin e familjes Baka nga fshati Bardhaj i Tepelenës.Pasi kryefamiljari, Refat Baka largohet nga shtëpia për shkak të punës për disa ditë… e vetme me dy fëmijët, asokohe shtatzënë njerka kryen aktin makabër. Pas një konflikti me 15-vjeçarin Eqerem Baka, Fatime vret këtë të fundit, ndërsa trupin e pajetë e fsheh në një pus pranë shtëpisë. Prej dy ditësh askush nuk dinte asgjë për 15-vjeçarin, ndërsa aroma e keqe zbuloi trupin e tij të pajetë dhe vuri në lëvizje policinë. Menjëherë njerka, e cila kreu këtë krim makabër u arrestua dhe u dënua me 25 vite heqje lirie në burgun e Gjirokastrës. Pas kthimit të Refatit në shtëpi pak ditë pas ngjarjes, ai nuk gjeti as gruan dhe as djalin e tij, ndërsa e bija u strehua nga të afërmit, prej të cilëve kryefamiljari mësoi lajmin e kobshëm. Që nga ai moment Refati nuk u interesua më as për ish-gruan dhe as për fëmijën e tyre, e cila erdhi në jetë pas hekurave më 22 maj 1952. Vajza u pagëzua me emrin Fatbardha Baka, ndërsa ende edhe sot e kësaj dite rezulton në trungun familjar të Refatit. Pas kësaj ngjarje që tronditi jo vetëm familjen Baka por edhe njerëzit përreth, Refati u martua për të tretën herë, ndërsa u bë baba edhe i 5 fëmijëve. Refati mbylli sytë përgjithmonë pa mundur ta takojë kurrë të bijën.Edhe pse babai dhe motra e madhe nuk e donin, sot janë 5 fëmijët e tjerë ata që janë në kërkim të Fatbardhës, ku për ironi të fatit jeta e saj nuk do të ishte ashtu siç kishte emrin. Ndaj sot, pas afro 7 dekadave i vellai Eqerem Baka vjen në studion tonë për të rrëfyer historinë e familjes dhe për të mësuar për fatin e motrës së tij