Historia e vdekjes së Feim Lilos është një histori e mbushur plot me mister, e cila ka ndodhur në Bari të italisë në vitin 2021. 27-vjeçari nga Pogradeci, prej afro 10 vitesh jetonte në Adelfia të Barit. Ishte data 29 nëntor 2021, ditën kur i ndjeri festonte 27 vjetorin, ndersa po fliste me familjarët e tij, të cilët po e uronin për ditëlindje. Askush nuk do ta priste se ajo ditëlindje dhe ai gëzim do të kthehej në një tragjedi. Sipas tyre Feimi ndihej i lumtur dhe se u kishte thënë që do të kthehej në Shqipëri për festat e fundvitit, për të festuar të gjithë së bashku. Pas 30 minutash ai i pohon atyre se duhej ta mbyllte telefonin dhe se do t'i merrte sërish më vonë, pasi i kishin ardhur tre shokë italianë për të festuar, për të cilët familjarën nuk janë në dijeni as sot e kësaj dite se për kë bëhej fjalë. Që nga ai moment telefoni i Feimit rezultoi i fikur. Të nesërmen pronari i fastfood-it ku punonte Feimi, njofton familjarët e tij në Pogradec, se ky i fundit nuk ishte paraqitur në punë. Pas 3 ditësh pritje pronari, i cili quhet Jetmir Hysenaj ka shkuar në shtëpinë e 27-vjeçarit dhe në pamundësi për t'u futur brënda, pasi gjithcka ishte e mbyllur, ai ka njoftuar policinë. Menjëherë autoritetet italiane kanë hapur derën me forcë dhe kanë gjetur trupin e Feimit të pajetë. Sipas dëshmisë së pronarit, Feimi është gjetur i vetëvarur. Ndërsa sipas dëshmisë së disa fqinjëve, Feimi ishte hedhur nga kati i dytë dhe trupi ishte gjetur në katin e parë të banesës. Por familjarët nuk dinë të thonë saktë atë çfarë ka ndodhur, pasi vdekja e tij ka ngritur pikpyetje të mëdha. Ato nuk kanë mundur të kontaktojnë me autoritetet italiane, por vetëm me pronarin. Për familjen kjo është një ngjarje mjaft e rëndë dhe e papritur. Ato nuk ishin në dijeni as se me kë jetonte së fundmi i ndjeri, sepse nuk iu kishte treguar. Pasi u mblodh shuma e parave që nevojiteshin, trupi i tij u kthye në atdhe më datë 7 dhjetor, ku u mbajt edhe ceremonia mortore e të riut. Arkivoli nuk u lejua të hapej nga personat që e shoqëruann nga Bari në Pogradec me justifikime të ndryshme. Prandaj kjo gjë ka ngritur më tepër dyshimet tek familjarët.