Zhduket veterani i Ushtrisë Çlirimtare të Kosovës nga Peja, Samir Puza i njohur me nofkën e luftës si “Maka”. 25 mars 2023 Ishte ora 8 e mbrëmjes kur 38-vjeçari doli nga shtëpia ku jetonte me vëllain dhe nënën në periferi të Pejës, ndërsa nuk u kthye më. Pavarësisht se kërkuan kudo, askush nuk e pa më që nga ajo mbrëmje Samir Puzën. E vetmja gjurmë e tij është pamja e një kamere pak metra larg shtëpisë, e cila ka pikasur të riun duke ecur në rrugën “Hasan Prishtina” në drejtim të qytetit të Pejës. Familjarët kanë bërë edhe një denoncim në policinë e Pejës, për të cilin kërkimet po vazhdojnë por ende pa rezultat. Një atdhetar i flaktë Samiri nuk donte të largohej kurrë nga Kosova ndërsa kishte luftuar me jetë për çlirimin e saj. I njohur si “Maka” ai ka qenë angazhuar në UÇK qysh në moshën 16-vjeçare. Në maj të 98-së mori pjesë në betejën e Loxhës, ndërsa aktivitetin ushtarak e kishte vazhduar në Koshare deri në përfundim të luftës. 38-vjeçari u rrit nga nëna e tij në Pejë ndërsa babai i ndërroi jetë kur ai ishte ende fëmijë. Djali i dytë nga 3 fëmijët e kësaj familje njihej nga të gjithë për urtësinë ndërsa nuk kishte konflikte me askënd. I gjatë 174 cm dhe me një peshë 76 kg, si shenjë dalluese Samir Puza ka një tatuazh në krahun e djathtë. Pikëpyetje të mëdha ngren zhdukja e Samir Puzës, ndërsa u zhduk në terrin e natës për të mos u kthyer më.