Opozita 4 orë marshime rreth kryeministrisë dhe sulmon Parlamentin (VIDEO)

Monika Kryemadhi pas përfundimit të protestës kishte një mesazh për të gjithë simpatizantët dhe kryeministrin Edi Rama."Kjo ishte protesta më e madhe që është parë ndonjëherë në Shqipëri. Rruga tashmë është nisur për të shpëtuar demokracinë. Ky është vendimi që qytetarët kanë marrë, opozita do ta udhëheqë. Tashmë rruga jonë nuk ka kthim pas, ne do të qeverisim zemërimin e shqiptarëve. Qytetarët do të largojnë Edi Ramën, ata sot morën në dorë fatet e tyre dhe cdo sakrificë do të jetë shumë e vogël për ta bërë Shqipërinë shtëpinë e tyre.Sot mori një shuplakë, loja do të hyjë prej vërteti, loja ka filluar të luhet fort, pasi ka vetëm një rrugë" tha Kryemadhi.

Deklarata e plote

Në emër të LSI-së dhe në emër të të gjithë atyre mbështetësve që ishin sot në protestën e organizuar, shpreh mirënjohje pafund për mijëra qytetarë shqiptarë që vërshuan sot në rrugët e Tiranës, me bindjen dhe me dëshirën për të protestuar ndaj kapjes së shtetit, për të protestuar ndaj të keqes më të madhe, e cila ka uzurpuar jetën dhe shpresën e shqiptarëve.
Sot qytetarët u përballën pa bërë asnjë hap pas, përballë pushtetit të grabitur, pushtetit kriminal dhe pushtetit të pamoralshëm të Edi Ramës. Populli tashmë e ka marrë vendimin e tij, vendim të pakthyeshëm për të refuzuar deri në fund që të qeveriset nga armiku i vetëm i tij, që është Edi Rama.  Sot qytetarët e Shqipërisë, por më shumë qytetarët e Tiranës bënë protestën më të madhe të pluralizmit në vend. Bënë protestën më të madhe që është parë në Shqipërinë më të rrudhur, sepse ata tashmë kanë respekt për veten e tyre dhe nuk e shesin dot lirinë e tyre me asnjë çmim ndaj kujtdo. 

Rruga tashmë është e nisur për të ndryshuar demokracinë në Shqipëri dhe lirinë e njerëzve në Shqipëri. Ky është vendimi që qytetarët kanë marrë. Opozita do ta udhëheqë atë në çdo orë dhe në çdo ditë zemërimin edhe indinjatën e qytetarëve kundër qeverisë të krimit, kundër narko-shtetit të Edi Ramës.  Tashmë rruga jonë nuk ka më kthim pas. Tashmë ne do të qeverisim zemërimin dhe indinjatën e qytetarëve shqiptarë, për të përmbushur një akt patriotik, që është integrimi i Shqipërisë në BE. Flamuri i Shqipërisë dhe zemra e qytetarëve do të jenë simbolet e Shqipërisë, që do ta çlirojnë atë nga krimi, nga korrupsioni, nga kapja e shtetit dhe nga varfëria. Qytetarët do të largojnë pengesën e vetme që kanë, për ëndrrën e tyre europiane, kjo pengesë e cila ka emrin e Edi Ramës. Ata kanë marrë në dorë sot fatet e tyre dhe çdo sakrificë për Shqipërinë do të jetë shumë e vogël përballë sfidës që kanë shqiptarët për ta bërë Shqipërinë shtëpinë e tyre, shtëpinë e fëmijëve të tyre.

Çdo qytet dhe çdo cep i Shqipërisë, sot i bën qytetarët e saj më të fortë, më të bindur që rruga e tyre nuk ka më kthim pas. Rruga e vetme që ka Shqipëria është integrimi në Bashkimin Europian sepse e vetmja gjë që shpëton Shqipërinë nga kapja e krimit, nga largimi njëherë e përgjithmonë i kriminelëve dhe grabitësve, jo vetëm të shpresës, por edhe të xhepave të shqiptarëve, është integrimi europian. Dhe për ta arritur këtë gjë duhet që të iki një orë e më përpara i vetmi njeri që mban peng Shqipërinë dhe shqiptarët, që mban peng ëndrrat e shqiptarëve, që mban peng shpresën e të rinjve shqiptarë, i cili është Edi Rama me sektin e tij kriminal. Sot ai mori një shuplakë. Loja tashmë do të hyjë prej vërteti. Loja ka filluar të luhet fort sepse ka vetëm një rrugë, e cila u krijon shqiptarëve mundësinë e vetme. Mundësinë e vetme për ta kthyer Shqipërinë në shtëpinë ë fëmijëve të tyre, në shtëpinë e familjeve të tyre. Faleminderit!

Rrethimi i Kuvendit të Shqipërisë i shkatërruar. E dëmtuar po ashtu me xhama të thyera, edhe zyra e rojës së godinës së Parlamentit. Gurë, shashka, kapsollë dhe mjete të forta të mbetura në rrugë. Janë këto pasojat e protestës së opozitës për më shumë se tre orë sot në një marshim rrethues tek Kryeministria, që vijoi më tej me një përplasje të dhunshme me policinë tek Parlamenti. Nga fotot e realizuara nga Antonio Çakshiri shihet ajo se çfarë ka lënë pas protesta.

Ekepertët kanë mbërritur tashmë në vendin e ngjarjes për mbledhjen e provave. Ndërsa gjithë perimetri ku u mbajt protesta është rrethuar me shiritin e sigurisë nga ana e policisë.

Lulzim Basha në fund të fjalimit të tij nga selia e partisë para protestuesve i cilësoi si horra policët e shtetit. E ndërsa akuzoi për provokim nga policia, referuar incidentit para parlamentit, Basha u bëri thirrje simpatizantëve që mos u kthejnë faqen tjetër kur i godasin, por ti godasin mbrapsht.

"Ne e kemi ndalur dhe do ta hedhim në lum qeverinë e tij kriminale dhe parlamentin e tij të krimit. Nuk ka rrugë tjetër përveç protestave popullore. Jemi shumë më shumë sot në 16 mars. Mos e ktheni faqen tjetër kur ju godasin horrat e shtetit, por goditini mbrapsht. Përfundimi është fitorja e lirisë, demokracisë dhe Shqipërisë si gjithë Europa" tha ai.

Pas katër orëve marshime rreth Kryeministrisë dhe dhunës te parlamenti, kryetrari i Partisë Demokratike udhëhoqi turmën drejt selisë blu për të mbyllur tubimin. Gjatë fjalës para protestuesve, Lulzim Basha kishte një mesazh në anglisht për ndërkombëtarët. Ai tha se nuk do të ketë stabilitet në Shqipëri pa demokraci dhe se ndërkombëtarët duhet të dëgjojnë shqiptarët dhe jo Ramën.

 "Sot më në  panik se kurrë kufoma politike e Edi Ramës dhe klikës së tij kriminale përshkallëzoi dhunën e paprovokuar ndaj protestuesve për ti larguar nga rruga e protestës, por përgjigjen e mori nga populli. Zotohem para jush se do të marrin përgjegjësi përpara ligjit. E gjithë Shqipëria dhe bota e ka parë sot vendosmërinë e një populli të bashkuar për liri dhe demokraci për ti dhënë fund pandëshkueshmërisë së Ramës dhe klikës së tij. Pa ju, pa zemrat tuaja, Kreshnike, ju o viganë mbrojtës të lirisë dhe demokracisë ky vend do të ishte  rreshtuar krah popujve pa liri. Ne e kemi ndalur dhe do ta hedhim në lumë qeverinë e tij kriminale dhe parlamentin e tij të krimit. Nuk ka rrugë tjetër përveç protestave popullore. Jemi shumë më shumë sot në 16 mars.

16 shkurti i hapi rrugën një vërshimi popullor që nuk do të ndalet por do të vijojë kundër grushtit të kriminelëve në pushtet. Dua ti dërgoj një mesazh të qartë miqve tanë perëndimore. 'Nuk ka stabilitet pa demokraci', Nuk ka stabilitet pa drejtësi, 'Nuk ka stabilitet pa ligj'. Mos dëgjoni Ramën, por zërin e njerëzve dhe të qytetarëve. Kjo që kemi nisur nuk do të zvogëlohet. Ne nuk do ta ulim kokën dhe nuk do ta pranojmë ti themi legjitime një qeverie të lidhur me krimin" tha Basha.

Por si do të vijojë më tej aksioni opozitar? Basha nuk dha detaje gjatë fjalimit, ndërsa u kërkoi simpatizantëve që të vijojnë betejën në cdo qytet në mënyrë të përditshme për të larguar Ramën.  "Ne cdo ta vijojmë këtë betejë, në cdo qytet, rrugë, lagje dhe shtëpie deri kur të hapim derën e Europës. Le ta bëjmë protestën tonë të përditshme dhe të përnatshme. Në Europë shkohet vetëm me zgjedhje të lira, duke i dhënë fund padrejtësisë. Kjo është rruga që do të clirojë ekonominë. Mos e ktheni faqen tjetër kur ju godasin horrat e shtetit, por goditini mbrapsht. Përfundimi është fitorja e lirisë, demokracisë dhe Shqipërisë si gjithë Europa" përfundoi Basha.  Kjo ishte protesta e pestë e opozitës brenda një muaji.

Gjatë zhvendosjes së turmës para parlamentit, turma çau kordonin, ndërsa policia reagoi duke hedhur gaz lotsjellës. Të prekur nga gazi ishin edhe liderët e opozitës, Basha dhe Kryemadhi, e cila është kapur nga kamerat duke mbajtur një shami përpara fytyrës.
 

Policia e Shtetit i ka bërë thirrje organizatorit të PD-së Gazmend Bardhi, gjatë momentit kur turma shpërtheu në dhunë duke çarë kordonin e sigurisë tek Parlamenti, dhe kur bllokuan autobotin e policisë në pedonale, që t'i kërkojë protestuesve të ruajnë qetësinë.

Thirrja e policisë

TË NDERUAR QYTETARË!

Nga protestuesit po kryhen akte të rënda dhune ndaj punonjësve të policisë, po cënohet rendi publik dhe siguria e qytetarëve.

I NDERUAR ZOTI GAZMEND BARDHI !

Si organizator i tubimit , ju lutemi kërkoni nga protestuesit të ruajnë qetësinë.

Protestuesit duhet të ndërpresin veprimet e dhunshme dhe të shpërndahen.

Ju bëjmë thirrje të distancoheni nga këto veprime të dhunshme

Veprimet e protestuesve janë të kundërligjshme dhe të dënueshme nga ligji penal.

Në rast se për 5 minuta nuk do të ndërprisni veprimet e kundraligjshme turma do të shpërndahet forcërisht nga  Policia e Shtetit e cila do të  përdorë forcën dhe mjetet e saj, sipas ligjit.

(Fotot Antonio Çakshiri/Shqiptarja.com)

Nën udhëheqjen e liderit demokrat Lulzim Basha, protestuesit e opozitës janë zhvendosur nga Parlamenti, dhe nisën një marshim me nëj ndalesë tek busti i liderit të dhjetorit '90. Azem Hajdari. Turma filloi të thërrasë emrin e ish-deputetit të ndjerë, Azem, Azem ti je gjallë.

Një veprim në një situatë aspak të këndshme për kryedemokratin, i cili vajzën e të ndjerit Hajdari, Rudinën, e përjashtoi nga partia pasi ajo zgjodhi të mos heqë dorë nga mandati i deputetit. 

Po sot, lideri demokrat teksa nisi marshimin drejt kryeministrisë në çelje të protestës, u shoqërua nga djali i Azem Hajdarit, Kiri, i cili pavarësisht mendimit të motrrës së tij, e ka mbështetur PD-në në protestat e mbajtura kundër qeverisë, që rrjedhimisht lë të kuptuar se ai përkrah vendimin e opozitë spër djegie të mandateve.

Lideri i opozitës Lulzim Basha pasi protestuesit sulmuan policinë me mjete të forta, gurë dhe shkopinj, dhe çanë kordonin e sigurisë para Parlamentit, u shfaq në një prononcim të shkurtër për mediat, në të parin fjalim që nga momenti i nisjes së protestës tek kryeministria. Basha tha se dhuna e protestuesve ndaj policisë është e justifikuar pasi ndaj tyre u hodh gaz lotjsellës.

"Pa larguar Edi Ramën Shqipëria nuk do të gjejë paqe. Protestuesit qëlluan me gurë pasi hodhën gaz ndaj grave dhe vajzave. Shqipëria e destabilizuar nga krimi ne do t'i japim fund, do jemi me qytetarët kudo, Edi Rama duhet të largohet një orë e më parë. Nuk mund të ketë stabilitet pa drejtësi. kush thotë të kundërtën rreshtohet para krimit të organizuar", tha Basha teksa u shfaq pasi përplasja me policinë kishte përfunduar.

Ishte nënë shoqërinë e ish-deputetëve të PD-së, ndërsa nuk u pa kryetarja e LSI-së Monika Kryemadhi.

Pas dhunës para parlamentit, protestuesit e opozitës vijuan marshimin duke u rikthyer në bulevard, ndërsa nën udhëheqjen e Bashës turma mori një kthesë të papritur duke u drejtuar për në selinë e PD-së. Nisur nga kronologjia e protestave të shkuara lëvizja drejt selisë do të thotë se do të kemi një mbyllje të protestës.

Report Tv sjell pamjet nga protesta e opozitës para parlamentit në momentin që shpërndahet turma pas hedhjes së gazit lotsjellës nga policia, pasi çanë kordonin.

Një grup protestuesish bllokuan policinë në pedonale, ndërsa efektivët janë përgjigjur duke hedhur ujë me autobotet duke shpërndarë turmën.

Një grup protestuesish bllokuan policinë në pedonale, ndërsa efektivët janë përgjigjur duke hedhur ujë me autobotet duke shpërndarë turmën.

Pas tensionimit të situatës dhe çarjes së kordonit të policisë, efektivët kanë hedhur për herë të dytë gaz lotsjellës duke larguar protestuesit nga hyrja e parlamentit. Në përforcim drejt parlamentit kanë shkuar edhe forca të tjera të FNSH-së. Ndërkohë që përveç efektivit të policisë është plagosur edhe njëri nga protestuesit. Nga të dhënat e para raportohet se i ka shpërthyer një kapsollë në duar duke i shkaktuar dëmtime ne fytyre.

Një polic është plagosur nga tensionet dhe çarja e kordonit të policisë nga protestuesit në hyrje të parlamentit. Pas dhunës ka mbërritur ambulanca për të dhënë ndihmën e parë, ndërsa makina është sulmuar me gurë nga protestuesit.

Pas dy orëve protestë paqësore para kryeministrisë që ndryshe nga radhët e tjera u mbajt vetëm me tre marshime rreth e qar godinës, me momente të vogla incidentesh duke rrëzuar rrethimet metalike rreth kryeministrisë, lideri demokrat Lulzim Basha, kryetarja e LSI-së, Monika Kryemadhi, dhe aleatët e djathtë, e tërhoqën turmën në një marshim drejt Parlamentit. 

Edhe atje pati forca policore, të organizuara përsakohë opozita nuk kishte bërë publike asnjë skenar të protestës. Basha, Kryemadhi dhe aleatët qëndruan përrreth 15 minuta në qetësi para parlamentit, kur në mesin e kësaj qetësie shpërtheu krejt papritur dhuna. Protestuesit u sulën ndaj kordonit të vogël të policisë që ndodhej në hyrje të parlamentit, duke e çarë atë. U desh hedhja e gazit lotsjellës që turma të shpërndahen menjëherë. Gjatë përplasjes një efektiv i forcave Shqiponja mbeti i palgosur. 

Menjëherë, autobote me ujë, forca të tjera të Ndërhyrjes së Shpejtë mbërritën me autoblind në Parlament për të përforcuar sigurinë rreth Parlamentit. 

Por në mesin e gjithë kësaj rrëmuje dhe tentative për të hyrë brenda në Parlament, ata që u 'fshehën' mes turmës, janë liderët politikë. Basha dhe Kryemadhi u zhdukën krejt papritur, ku duket se teksa kanë dhënë ';urdhrat' për dhunë, janë larguar duke i shpëtuar syrit të mediave. Megjithatë, është e pritshme dhe e mundshme që lideri demokrat Basha dhe Kryemadhi të dalin më tej në deklarata dhe të distanciohen nga dhuna...siç ka ndodhur edhe në tubimet e tjera. 

Protestuesit u sulën ndaj kordonit të vogël të policisë që ndodhej në hyrje të parlamentit, duke e çarë atë. U desh hedhja e gazit lotsjellës që turma të shpërndahen menjëherë. Gjatë përplasjes një efektiv i forcave Shqiponja mbeti i palgosur. 

Menjëherë, autobote me ujë, forca të tjera të Ndërhyrjes së Shpejtë mbërritën me autoblind në Parlament për të përforcuar sigurinë rreth Parlamentit. 

Kur gjithcka dukej e qetë dhe pas tre marshimeve rreth kryeminsitrisë, lideri demokrat Basha, Monika Kryemadhi dhe aleatët e djathtë e udhëhoqën turmën duke e çuar para Parlamentit, pas një pritje të gjatë për të mësuar se cfarë vendimi do të merrej për vijimin e protestës, kanë nisur përplasjet e para. Një efektiv i forcave të policisë, të repartit Shqiponja ka mbetur i plagosur. 

Protestuesit kanë carë kordonin e policisë tek Parlamenti dhe janë shpërndarë menjëherë pas hedhjes së gazit lotsjellës. Disa protestues kanë qëlluar me gurë drejt efektivëve të policisë, edhe pasi u shpërndanë. Kanë qenë të përgatitur për këtë skenar, pasi në mesin e protestuesve ka pasur prej atyre që janë të pajisur me maska kundra-gaz. 

Qytetarët në rrjetet sociale kanë ironizuar skenarin e protestës së opozitës, e cila nisi me një marshim tre herë rreth Kryeministrisë, ndërsa më pas simpatizantët e PD-së dhe LSI-së i janë drejtuar parlamentit.

 

Pas tre marshimeve rreth Kryeministrisë protestuesit zhvendosen te Parlamenti

Pas tre marshimeve rreth Kryeministrisë ende nuk dihet se cfarë do të ndodhë me skenarin e tubimit të opozitës, pasi protestuesit kanë përshkuar bulevardin duke u futur te pedonalja ku ndodhet edhe Ministria e Brendshme për të dalë te parlamenti. Gjatë lëvizjes janë hedhur disa kapsolla, por nuk është shënuar asnjë incident. Një lëvizje e papritur e protestuesve, ndërsa nuk dihet nëse tubimi do të mbyllet në selinë e PD-së apo do të rikthehen sërish para Kryeministrisë.

Ditën e sotme opozita nisi një protestë pa bërë publik asnjë skenar se si do të mbahej ajo. Nisi me tre marshime surprizë njëri pas tjetrit rreth e qar kryeministrisë, dhe më tej liderët polikë nën udhëheqjen e Lulzim Bashës, Monika Kryemadhit dhe aleatëve të djathtë, e zhvendosën marshimin duke lënë kryeministrinë, dhe duke vijuar rrugëtimin në bulevard, tek ministria e Brendshme, pedonalja, e për të qëndruar para godinës së Parlamentit.

Por teksa protestuesit ishin përgatitur për një protestë të gjatë që nuk do të mbaronte deri në largimin e kryeministrit Rama, ata kanë mbetur pa busull dhe pa ditur si të veprojnë. Ata u shprehën për mikrofonin e Report Tv në nisje të protestës se nuk do të linin sheshin e bulevardit "Dëshmorët e Kombit", derisa të rrëzohej qeveria Rama. Por me largimin e liderit të opozitës nga protesta para kryeministrisë, dhe zhvendosjen e saj para Parlamentit, protestuesit kanë zgjedhur të pushojnë në lulishten pranë Kryeministrisë, tek Piramida, duke shijuar edhe temperaturat e larta që shoqëruan këtë të shtunë të 16 marsit.

Protestuesit e Partisë Demokratike dhe Lëvizjes Socialiste për Integrim në protestën e sotme kanë synuar që mesazhet t'i përcjellin edhe përmes pankartave në gjuhë të huaj për ndërkombëtarët.

'Europë atenttion, Albania is in protest' ('Europë, vëmendje, Shqipëria është në protestë)'  ishte njëra nga shumë pankartat e protestuesve para Kryeministrisë.

Tre fjalimet e vetme të përfaqësuesve politikë para protestuesve tek kryeministria, i mbajti ish-deputeti Flamur Noka, i cili i bëri thirrje mbështetësve ta ndjekin në një marshim protestues rreth kryeministrisë, një skenë që u përsërit tre herë. 

Por edhe pse Basha kishte menduar që fjalimet t'ia linte Flamur Nokës për të ftuar turmën në marshim, nuk mundën t'i shpëtonin problemeve me zërin.

Pas kryedemokratit Basha që gjatë fjalimeve politike para mbështetësve i ikën zëri, të njëjtin 'fat' pati edhe Flamur Noka.

Për më shumë ndiqni videon...

Ish-deputeti i PD-së Flamur Noka i ka bërë thirrjen e tretë protestuesve të nisin marshimin e radhës rreth e qark kryeministrisë. Nën udhëheqjen e Lulzim Bashës, protestuesit bëjnë një marshim rreth godinës së kryeministrisë, për të dalë sërish në mes të sheshit në Bulevard.

Duket se marshimet do të jenë të gjata, pasi eksponentë të PD-së janë shprehur se protesta nuk do të ndalet.

Ish-deputetja e Partisë Demokratike, Grida Duma në një prononcim për Report Tv u shpreh se protesta e opozitës do të jetë e gjatë dhe nuk do të mbyllet sot. "Protesta është paqësore. Bulevardi mbetet i mbushur, qytetarët kërkojnë që të qëndrojnë gjatë. Protesta nuk ka ende një limit, do të përcaktohet nga qytetarët. Mesazhi, është rrugëtimi drejt fitores. Protesta mendohet të jetë, e gjatë, e qëndrueshme dhe e fortë, nuk mendoj se do të përfundojë sot" tha Duma.
 

E ndërsa në protestën e parë u përplasën me policinë duke djegur hyrjen e Kryeministrisë, sot duket se ka ndryshuar strategjia e opozitës, të paktën deri tani, teksa njëri nga protestuesit me një termus me ujë u ka ofruar nga një shishe policëve. Disa prej tyre e kanë pranuar, ndërsa të tjerë jo.

Ish-kryeministri Sali Berisha nga protesta para selisë së qeverisë thotë se tubimi është një cunam popullor, ndërsa Rama ia mbathi duke u fshehur në Skrapar. “Edi Rama ia ka mbathur sërish ditën e sotme. Edi Rama ka shkuar të tunelet e Skraparit. Ky është një cunam popullor dhe Rama nuk mund t’i fshihet" deklaroi Sali Berisha.
 

Në protestën e opozitës para kryeministrisë është parë edhe Dasho Aliko, ish-kryekomunar i Lazaratit, i zgjedhur tashmë në krye të Partisë Demokratike të Gjirokastrës.

Më herët, kur kryeministri Edi Rama bëri një vizitë në qarkun e Gjirokastrës, në kuadër të zgjedhjeve lokale, Dash Aliko organizoi një grup njerëzish për ta pritur me protesta kreun e qeverisë në urën e liqenit të Viroit në hyrje të qytetit të Gjirokastrës.

Këto janë pamjet me dron që tregojnë pjesëmarrjen në protestën e opozitës para kryeministrisë. Gjithashtu, pamjet nga Report Tv te realizuara me dron, shfaqin edhe momentin kur protestuesit nisën një marshim proteste, një ecje rreth e qark kryeministrisë që u udhëhoq nga ish-deputeti Flamur Noka. 

Pamjet shfaqin qartë pjesëmarrjen në protestë. 

Pas lëvizjes së parë rreth Kryeministrisë, Flamur Noka u ka kërkuar protestuesve që të vijojnë sërish në një lëvizje në formë marshimi rreth godinës së Kryeministrisë. "Ne kemi rrethuar Edi Ramën, do të jetë i rrethuar nga sot e tutje nga revolta e popullit. Rama ik, se nuk ka zgjidhje tjetër. Ik sa nuk është vonë, ikja jote është shpëtim për ty, Shqipërinë dhe shqiptarët. Ne jemi të vendosur në kauzën tonë dhe do ta vijojmë protestën tonë marshim. A jeni dakord? A e mbajmë të rrethuar strehën e krimit dhe korrupsionit? (Turma përgjigjet po). Na ndiqni" ishin thirrjet e Flamur Nokës.
 

Familja e Azem Hajdarit është e ndarë përsa i përket aksionit që opozita po zhvillon kundër qeverisë Rama. Rudina Hajdari nuk pranoi që të digjte mandatin duke qëndruar në Kuvend, ndërsa PD-ja e përjashtoi nga strukturat.

Ndërkohë që vëllai i saj, Kiri vijon që të marrë pjesë në tubimet e opozitës në krah të Lulzim Bashës, teksa edhe sot ka pasur shtrëngim të duarve me liderin e PD-së dhe takim miqësor teksa nisën marshimin nga selia në drejtim të Kryeministrisë që çeli protestën e kësaj të shtune kundër qeverisë Rama. 

Kështu për njërin nga fëmijët e Azem Hajdarit, parlamenti është streha e demokracisë, ndërsa për tjetrin streha e krimit.

Është shënuar incidenti i parë në tubimin e PD-se dhe LSI-se, teksa pas godinës se Kryeministrise është rrëzuar gardhi metalik nga simpatizantët e opozitës. Po ashtu protestuesit rrëzuan edhe një motor të forcave të policisë që ndodhen në terren për garantimin e rendit dhe sigurisë publike

Marshim protestues rreth kryeministrisë. Në një lëvizje të papritur nga para kryeministrisë, protestuesit kanë nisur një marshim nga sheshi përpara kryeministrisë, në rrugën "Ismail Qemal", që ndan Hotel Rogener me kryeministrisë, për në drejtim të anëve të tjera të kryeministrisë, për ta rrethuar atë.

Turma u nis në këtë marshim protestues rreth kryeministrisë pas thirrjes së ish-deputetit të PD-së, Flamur Noka, që çeli fjalimet në protestë dhe mori pas vetes turmën rreth kryeministrisë. Turma ka kaluar pranë rrethimit metalik rreth kryeministrisë, por pa tentuar në asnjë moment të ketë përplasje me kordonët e policisë.

Një pjesë kanë ndjekur Flamur Nokën, një pjesë e protestuesve kanë qëndruar para kryeministrisë.

Mesa duket ky plan i PD-së, është ditur edhe nga autoritetet, pasi kryeministria ishte e rrethuar me gardh metalik në të gjitha anët e saj.

Në nisje të protestës para Kryeministrisë, e pyetur nga mediat mbi vendimin e Lefter Kokës për të mos djegur mandatin, Monika Kryemadhi është shprehur se nuk i intereson fare.  “Nuk më intereson fare Lefter Koka. Vendimi i tij është personal”- tha Kryemadhi.

Nën himnin kombëtar, flamurin amerikan, dhe melodia e filmit për Gjergj Kastriot Skënderbeut, është çelur protesta e opozitës para kryeministrisë.

Flamur Noka ka çelur fjalimet në podiumin e ngritur para kryeministrisë duke thënë se kjo është revolta më e madhe e popullit kundër Edi Ramës.

"Të tregojmë se dimë të protestojmë. Të ju tregojmë se përfaqësojmë vlerat tuaja, vlerat e qytetrimit. Ne do të marshojmë, kjo protest do të jetë marshim. Përshëndetje vëllezër dhe motra. Qytetarë të Tiranës dhe të mbarë Shqipërisë. Kjo është protesta më e madhe që ka njohur ndonjëherë historia. Kjo është shenjë e revoltës më të madhe popullore ndaj një regjimi. Rama ik!! Rama ik, se nuk përballon revoltën e popullit ndaj teje dhe bandës tënde. Ne sot po bëjmë një muaj nga dita kur ju qytetarët e Shqipërisë, populli shqiptar, vendosi të shkruajë historinë e vet. Është dita kur këto zyra, ky kryebandit që është i strehuar aty mori një mesazh. Dhe mesazhi çdo ditë e më shumë kumbon “Rama ik, Rama ik”. Rama ik, se ti nuk mundesh të rrish më në atë karrige. Ti mund të ikësh kudo, por je i rrethuar, kudo që të shkosh, je i rrethuar nga revolta e popullit tënd. Je i rrethuar nga përbuzja e qytetarëve të tu, që i ke shkelur, i ke dhunuar dhe i ke varfëruar. Rama ik! Vëllezër e motra, kjo protestë do të jetë marshim. Na ndiqni! Do të jetë marshim, sepse ne do të tregojmë se dimë të protestojmë, Rama ik, Rama ik! Na ndiqni! Na ndiqni në këtë marshim proteste, në këtë marshim revolte ndaj bandës dhe korrupsionit, ndaj kryebanditit. Rama ik! Rama ik! Rama ik! Populli ka folur! Rama ik!  Nuk përfaqëson dot ti shqiptarët më. Rama ik! Rama ik! Rama ik! Na ndiqni, na ndiqni vëllezër!   Rama ik! Rama ik! Koha e fjalëve ka mbaruar. 16 shkurti ishte dita kur koha e fjalëve mori fund. Është koha e veprimit qytetar, Rama ik, Rama ik. Na ndiqni, e morët e vesh apo jo?! Marshim proteste!  Do të marshojmë, protest ndaj bandës. Përpara!", tha Noka.

Në këto pamje nga lart të protestës shihet pjesëmarrja në protestën e opozitës para kryeministrisë, teksa janë mbledhur të gjithë tubuesit, dhe me mbërritjen e liderëve Lulzim Basha i PD-së dhe Monika Kryemadhi e LSI-së ju bashkuan mbështetësve dhe simpatizantëv të tyre para godinës së kryeministrisë. 

Është konsideruar prej tyre protesta më e madhe për të rrëzuar qeverinë. Por se sa është pjesmarrja, Report Tv e sjell përmes këtyre pamjeve nga lart të protetës.

Lideri demokrat Lulzim Basha ka dalë nga selia blu i shoqëruar nga bashkëshortja e tij dhe me dhjetra mbështetës dhe ish-deputetë për t'ju bashkuar protestës tek Kryeministria. 

Nga ana tjetër, nga selia e Lëvizjes Socialiste për Integrim, Monika Kryemadhi, marshoi nga selia e LSI me mbështetësit e saj, për tu bashkuar në bulevard me protestuesit. Në këtë rrugëtim në një prononcim për mediat, Kryemadhi tha se vetë kryeministri Edi Rama është duke u përgatitur për zgjedhje të parakohshme dhe madje po mendon sipas saj, edhe se cili do të jetë kryeministri i qeverisë së re. 

"Z. kryeministër ka një problem shumë të madh me shqiptarët, me veten e tij, me besimin e tij në vetvete sepse normal që besimi do ti mungojë në vetvete sepse një njeri që nuk beson në Zot dhe tallet me Zotin, normal që nuk ka se si të kuptojë se çfarë ndodh. Unë mund të them vetëm këtë gjë, që në momentin që Edi Rama flet për zgjedhje të parakohshme, po përgatitet për zgjedhje të parakohshme, madje po përgatitet edhe për kandidatin për kryeministër të qeverisë tjetër, por ky nuk është problemi ynë, është problemi i z. Rama. Problemi ynë është hapja e negociatave që Shqipëria të jetë pjesë e Bashkimit Europian, ky është problemi ynë, ne aspirojmë për këtë, mjaft më me tranzicionin, mjaft me këtë qeveri dhe shtet të kapur, mendojmë që shqiptarët meritojnë më shumë se kushdo për të qenë anëtarë të BE-së, meritojnë më shumë se kroatët, meritojnë më shumë se sllovenët sepse e kemi filluar procesin e integrimit në Bashkimin Europian me Kroacinë dhe sot Kroacia është anëtare e Bashkimit Europian, ndërsa ne akoma diskutojmë hapjen e negociatave", tha Kryemadhi.

Protestuesit e opozitës kanë hedhur një tymuese para forcave të policisë tek Kryeministria. Është shuar menjëherë nga një i ri i forumit rinor të PD-së i cili ishte në rresht para kordonit të policisë, me një shirit të bardhë identifikues në krah. 

Oranizatorët e opozitës janë shprehur se nuk do të ketë dhunë. 

Protestuesit e opozitës janë mbledhur para kryeministrisë për të nisur tubimin e paralajmëruar për në orën 11:00. Nga fotot e realizuara nga Antonio Çakshiri, shihet se sa është pjesëmarrja qytetarë në këtë protestë të radhës kundër kryeministrit Edi Rama. 

Ashtu si edhe në protestat e shkuara të opozitës, nuk mund të mungonte në tubimin e 16 marsit para kryeministrisë. Ish-truproja i ish-kryeministrit Sali Berisha, Sali Lushaj, në protestën tek kryeministria. Lushaj është njëherazi babai i këngëtarit të muzikës Hip-hop, Arkimed Lushaj, njohur me emrin skenik "Stresi". Ky i fundit ndodhet në qeli për armëmbatje pa leje.

Kreu i Forumit Rinor Demokrat, Bleind Këlliçi, tha për Report Tv, se protesta e opozitës do të jetë paqësore. Megjithatë ai nuk përjashtoi mundësinë që në mesin e protestuesve të ketë edhe persona që dalin jashtë skenarit të organizatorëve. "Nëse do të ketë revoltë më të madhe nga çfarë ne presim, i themi që problemin nuk e kemi me policinë por me Edi Ramën", tha Këlliçi teksa protestuesit janë mbledhur para kryeministrisë, por që ende nuk kanë mbërritur liderët e PD-së Lulzim Basha, dhe e LSI-së Monika Kryemadhi.

Këlliçi tha se mesazhin e një proteste paqësore, PD e jep përmes një kordoni të të rinjve të forumit, që janë vendosur para forcave të policisë tek Kryeministria.

"Të rinjtë janë në ballë të protestës për të dhënë mesazh paqeje, për të frenuar çdo skenar dhune, përpos gjithë propagandës që është bërë nga qeveria se protesta do jetë e dhimbshme", tha Këlliçi për gazetarin e Report Tv, Arsen Rusta.

Partia Demokratike ishte shmangur nga fjalimet në protestën e saj më 16 shkurt para kryeministrisë, e cila shpërtheu në dhunë. Por në këtë tubim të 16 marsit kundër qeverisë, opozita e bashkuar jo parlamentare ka planifikuar të mbajë fjalime, në një podium të ngritur para godinës së kryeministrisë.

Në sfond dëgjohet muzikë e vendosur nga organizatorët, ndërsa protestuesit janë të pajisur me vuvuzela. Para kordonit të policisë pas një rrethi metalik tek Kryeministria, janë vendosur të rinjtë e Forumit Rinor të PD-së, me një shirit të bardhë në krah, për të dhënë një mesazh që protesta do të jetë paqësore.

Foto nga Antonio Çakshiri

Edhe pse lideri demokrat Lulzim Basha ende nuk ka dalë nga selia blu, protestues janë mbledhur pra godinës së kryeministrisë, për të nisur tubimin në orën 11:00.

Qytetarë të ndryshëm në protestën e opozitës para kryeministrisë, në prononcime për gazetarët e Report Tv në terren, thonë se nuk do të largohen nga kryeministria deri në largimin e Edi Rama.

"Nuk i shpëton zemëratës së popullit, nuk jemi partiak, thirrja ime është vëllazërore, dëgjoje popullin. Sot diskuton populli thesin e miellit, të jesh i bindur që nuk largohemi nga këtu. Nuk ikim nga Tirana pa rrëzuar Edi Ramën. Populli do të qëndrojë këtu", shprehen ata.

Lideri i Partisë Demokratike Lulzim Basha rreth orës 10:00 ka mbërritur në selinë blu. I shoqëruar nga bashkëshortja e tij, Aurela, kryedemokrati do të mbajë në seli një takim me ish-deputetët dhe aleatët e tij. Më tej është marshimi drejt kryeministrisë për të nisur në orën 11:00 protestën kundër qeverisë. 

Pas lajmit të publikuar mbrëmjen e djeshme se kryeministri Rama kishte hequr skelën mbrojtëse para Kryeministrisë, Lulzim Basha ka dërguar Gazmend Bardhin dhe Sahitin për të inspektuar Kryeministrinë.

Ata janë fotografuar mbrëmë vonë duke inspektuar Kryeministrinë, dhe më pas janë larguar.

Personazhi tashmë i njohur, Dilaver Nela 55-vjeç nga Laçi ka surprizuar sërish në tubimin e sotëm të opozitës. E ndërsa pak ditë më parë në rrugët e Tiranës ai kishte një kazan dhe lugë dhe pankarta në dorë, në protestën e sotme ai kishte tre tepsi mbi kokë, të cilat sipas tij simbolizojnë tre partitë kryesore në vend, PS-në, PD-në dhe LSI-në dhe dy pankarta, në njërën prej tyre shkruan 'S'ka Shqipëri, ka tre tepsi' dhe në tjetrën 'Shoqëria civile'.

Në një prononcim për gazetarin e Report Tv, Arsen Rusta ai thotë se ditën e hënë te ambasada amerikane do të hedhë kandidaturën si president i vetëshpallur. "Ky shtet ka mbaruar, ky estabilishment ka përfunduar. Unë protestoj kundër këtij estabilishmenti që na ka lënë larg Europës.

Ditën e hënë do të shkoj te ambasada amerikane, që të hedh kandidaturën si presidenti i vetëshpallur si Guaido (Presidenti i Venezuelës). Kjo klasë politike mbahet nga ndërkombëtarët" tha ai. Pas prononcimit ai është tentuar që të largohet nga protesta nga një person, simpatizant i opozitës, që i ka hequr nga koka tepsitë që kishe vendosur. Por kush është Dilaver Nela? (Lexo ketu)

Ndryshe nga herët e tjera kur ka pasur protesta, sot në hyrje të Kryeministrisë nuk do të ketë skelë mbrojtëse. Megjithatë, në instalacionin mbi hyrjen e godinës është vendosur një mbrojtëse. Ndërkohë që është vendosur edhe një gardh metalik rreth selisë së qeverisë për të shmangur depërtimin e protestuesve.

Edhe efektivët e policisë së Tiranë janë bërë gati që herët në mëngjes për protestën e opozitës. Janë mbledhur para kryeministrisë së bashkua me mjetet mbrojtëse të tyre. Rreth 1600 forca policie janë në terren për të garantuar mbarëvajtjen e protestës, ndërkohë që shihet teksa kanë me vete edhe maskat kundra-gaz.

Kryeministria është rrethuar me gardh hekuri për të shmangur ndonjë tentativë të tubuesve për të thyer kordonin e policisë. Ky rrethim metalik nuk ka qenë në protestën e 16 shkurtit që opozita mbajti para kryeministrisë.

Po ashtu nga hyrja e godinës së qeverisë është hequr edhe skela në derën kryesore që mbronte edhe instalacionin në hyrje. Mjetet e skelës u përdorën nga protestuesit në tubimin e shkuar për të thyer xhamat e derës së kryeministrisë.  Kryeministria ka larguar edhe atë çka mbeti nga instalacioni i kërpudhës në lulishten e kryeministrisë që u shkatërrua gjatë protestës së 16 shkurtit.

Krahas policisë së rendit, në mbarëvajtjen e protestës do të angazhohen edhe efektivë të Forcave të Ndërhyrjes së Shpejtë dhe ata të repartit Shqiponja.

Anash dhe pas kryeministrisë, janë pozicionuar edhe efektivë të forcave RENEA.

Oficerë të antiterrorit do të kontrollojnë personat që dyshohen si elementë të rrezikshëm dhe punonjësit e Gardës së Republikës do të monitorojnë situatën me dylbi, nga tarracat e institucioneve.

.

Kryetarja e Lëvizjes Socialiste për Integrim, Monika Kryemadhi që në orët e para të këtij mëngjesi është gjendur në zyrën e saj në selinë e LSI-së. Prej aty, nën organizimin e partisë, protestuesit do të mblidhen për t'ju bashkuar edhe mbështetësve të PD-së në bulevardin "Dëshmorët e Kombit" para kryeministrisë.

Nga qyteti i Fierit janë nisur protestues nën organizimin e kryetarit të PD-së në degën e këtij qyteti, Luan Baçi.AI pretendon se policia ka marrë në telefon shumë protestues që të paraqiten në komisariat, duke e parë këtë si një tentativë për të penguar mbështetësit e PD-së që të mos shkojnë në Tiranë.

Nga Shkodra, ish-deputeti Bardh Spahija tha se është koha për rrëzimin e diktatori Edi Rama, siç ai e quajti. "Çdo skenar është në dorë të qytetarëve", tha ai.

Nga Kukësi, kryetari i degës së PD-së, Arif Rexhmati e quajti pjesëmarrjen më të madhe qytetarë për të kërkuar largimin e kryeministrit Rama.