‘Mbrojmë Nartën’, protestë në Zvërnec kundër ndërtimit të resortit! Qytetarët: I japim zë flamingove, të anulohet projekti! Kauzës i bashkohet me not edhe Eva Buzo: Jam këtu për suport

Protesta kundër ndërtimit të resortit në Zvërnec u mbyll me marshimin e protestuesve nga plazhi i Dalanit drejt Portonovit.

Në protestën për Zvërnecin një ambientalist tha për Report Tv se ata nuk janë kundër investimeve, por jo në këtë zonë.

“Dunat shekullore janë sheshuar dhe është hedhur çakull. Edhe në kodrat e Zvërnecit është gërryer masiv dheu. Nuk jemi kundër investimeve, por në këtë zonë nuk jemi pro, sepse është një zonë e mbrojtur dhe sidomos në atë shkallë. Nëse këtu do të ketë ndërtim s’do mvbetet asgjë për natyrën.

Protesta nuk do të ndalojë. Sot e kësaj dite leja nuk është zbardhur, sepse përveçse po shkatërrohet një zonë natyrore po shkelin ligjet me të dyja këmbët. Kështu këtu po bëhet një ndërhyrje e jashtëligjshme", tha ai.

Protesta në Zvërnec mori një formë krejt të veçantë. Dhjetëra qytetarë u rreshtuan në bregun e detit duke formuar me trupat e tyre fjalën “SAVE NARTA”, një protestë simbolike për mbrojtjen e lagunës dhe kundërshtimin e projektit turistik që parashikohet të ndërtohet në zonë.

Avokatja dhe notarja shqiptaro-australiane Eva Buzo është rikthyer sërish në Vlorë për të realizuar një tjetër sfidë sportive në ujërat e Jonit. Ajo ju bashkua protestës së banorëve në Zvërnec kundër resortit.

Notarja e rekordeve u nis me not nga Radhima, përshkroi me not ishullin e Sazanit dhe mbërriti në plazhin e Dalanit në Zvërnec duke thirrur atdhe.

"Shpresoj që të mbetet e paprekur dhe që të gjithë shqiptarët të mund të vazhdojnë të shijojnë natyrën e bukur që kanë. Faleminderit shumë që erdhët dhe jam vërtet mirënjohëse ndaj aktivistëve që mbështetën këtë nismë. Jam këtu për të dhënë mbështetjen time për njerëzit e mrekullueshëm të Shqipërisë, të cilët po përdorin zërin e tyre për të folur për çështjet që kanë rëndësi për ta. Është shumë e rëndësishme që të dëgjojmë të rinjtë, të mbrojmë mjedisin tonë dhe t’u kërkojmë llogari qeverive tona", tha ajo. 

Dy vite më parë, Buzo tërhoqi vëmendjen e opinionit publik, kur realizoi me not distancën nga brigjet e Italisë drejt Karaburunit.

 Këtë të shtunë në plazhin Dalan po mbahet protesta për ndërtimin e resortit në Zvërnec.

Një nga protestuesit gjatë fjalës së tij tha se para një jave kjo zonë ishte bërë si kamp përqendrimi.

“Para një jave këtu ishte bërë si kamp përqendrimi. Ishte e rrethuar nga bandita e gangsterë të armatosur. Atdheu është një fjalë që nuk pranojnë të tërheqin zvarrë qytetarët që kërkojnë të drejtën e tyre. Atdheu ishte i yni”, tha ai.

Report Tv sjell pamjet me dron nga zona ku prit të ndërtohet resorti, një peizazh i rrallë ku laguna takon detin. Gardhi i famshëm i përplasjeve pranë Hidrovorit, të cilit pas protestave iu hoqën telat me gjemba, tashmë nuk ekziston më. Sot është hequr, nuk më as makineri, dhe pamjet e plazhit të virgjër janë mbresëlënëse.

Projekti ende nuk është finalizuar, pasi i pari është rrëzuar nga institucionet shqiptare, e i dyti është kthyer për ndryshime, por sipërfaqja ku ai do të shtrihet nuk ndryshon!

Në të përfshihet një zonë pyjore me pisha dhe 3 gjire plazhi, Dalan, Porto Novo dhe Hidrovor, të cilën ndodhen në të njëjtin brez ranor, në Zvërnec.

Toka ku do të shtrihet resorti, ndan detin Adriatik me Lagunën e Nartës. Vendndodhja e tij pranë një zonë me ndjeshmëri të lartë mjedisore, siç është Laguna e Nartës, ka ngjallur debate të shumta.

Zona ku resorti do të ndërtohet është peizazh i mbrojtur, i kategorisë së pestës, çka nuk kufizon aktivitetin ekonomik, social apo turistik. 

Teksa qytetarët pritet të mbajnë një protestë kundër resortit në Zvërnec, banori Minella Balliu tha për mikrofonin e Report Tv se prona është blerë nga gjyshi i tij në vitin 1932 dhe sipas tij ekziston edhe dokumenti i blerjes dhe transkripti.

Kjo pronë është e blerë nga gjyshi im në 1932, ndërsa ekziston dokumenti i pronës dhe transkripti. Ndërsa në 1946 më është sekesutruar 220 ha nga shteti komunist. Pas viteve ’90 ma ka njohur Gjykata e Vlorës. Toka ime është këtu (brenda territorit që këtu e deri tek kodra)” shpjegon ai për gazetarin Armand Xhelili.

Banori shton se këtë pronë Artur Shehu e ka marrë me dokumente të falsifikuara. Ai nënvizon se pronën Shehut ia ka njohur gjyqtari Alaudin Malaj, ish-kreu i Apelit në Tiranë në vitin 2009, pikërisht kur në pushtet ishte Sali Berisha.

“Këtë pronë e ka marrë Artur Shehu me dokumente të falsifikuara.  Nga diskutimi që bëmë me Kryeministrin ia kam ngritur shqetësimin dhe i kam thënë se nuk duhet bërë asgjë pasi jam në proces gjyqësor. Arturi Shehut pronën ia ka njohur gjyqtari Alaudin Malaj, ish-kreu i Apelit në Tiranë në vitin 2009. Gjykata e Lartë e hodhi poshtë vendimin e Alaudin Malajt dhe çështja nisi nga fillimi në Gjykatën e Vlorës”, shtoi Minella Balliu.

Teksa mbante një kapele me emrin e Donald Trump Balliu tha se ata janë pro investimit në Zvërnec

“E mbaj vet a do vijnë të investojnë amerikanët këtu unë jam pro investimit, se nuk do rrimë me kasolle në mal”, përfundoi ai.