Ministria e Mbrojtjes ka bërë një bilanc të situatës së përmbytjeve dhe bllokimit të akseve rrugore në të gjithë vendin të shkaktuar nga shirat e dendur dhe rrëshqitja e dherave. Ministri Niko Pelishi shprehet se ushtria është në gatishmëri dhe se po ndihmohen familjet në nevojë dhe po punohet për zhbllokimin e rrugëve.

Kryeministri Edi Rama dhe kreu demokrat Lulzim Basha kanë qenë të pranishëm të dy, në kohë të ndryshme, në Obot të Shkodrës, zona më e prekur nga përmbytjet në Shkodër.

Briland Thani, 23 vjeç, është arrestuar në Shkodër me qëllim ekstradimin drejt Italisë, ku kërkohet për vjedhje me armë.

Situata e përmbytjeve në vend gjatë pasdites ka vijuar sërish të krijojë problematika të ndryshme. Reshjet e dendura të shiut por edhe të dëborës në veri të vendit kanë bërë që disa nga akset rrugore të jenë të bllokuara, ndërsa sipërfaqe të tëra toke të jenë në ujë.

Moti i keq dhe shirat e pandërprerë, çahet tubacioni kryesor i ujësjellësit të Bogovës. Banorët e Beratit, Bogovës, Poliçanit dhe Kuçovës kanë mbetur pa ujë të pijshëm që prej mëngjesit të sotëm.

Situata në qarkun e Shkodrës paraqitet problematike ku në total qarku janë përmbytur 1630 ha tokë, shumë rrugë janë të bllokuara ose nga dëbora ose nga rrëshqitja e dherave si dhe disa zona kanë ndërprerje të vazhdueshme të energjisë elektrike për shkak të motit të keq.

Reshjet e dëborës kanë qenë me intensitet të lartë edhe në Rrugën e  Kombit, ku kompania koncesionare ka nxjerrë borëpastruese për pastrimin e saj dhe kriposjen e aksit rrugor.

Situata në qarkun e Lezhës ka një përmirësim krahasuar me një ditë më parë, pasi sasia e reshjeve ka qenë më e ujët, por që ka prezencë të sipërfaqeve të përmbytura dhe probleme në disa akse rrugore ku ka pasur rrëshqitje dherash. Gjithashtu në disa zona janë evakuuar edhe banorë nga banesat e tyre dhe janë strehuar në një vend të siguritë, pasi rrezikonin nga përmbytjet.

Pas alarmit të hedhur në rrjetet sociale, presidenti Ilir Meta ka nxituar për të shkuar drejt qytetit të Shkodrës ku i ka ardhur në ndihmë kryebashkiakes në detyrë Voltana Ademi, të cilët janë ulur duke ngrënë drekë dhe pirë verë.

Bashkia e Durrësit njofton këtë të shtunë mbi situatën e reshjeve në qytetin bregdetar. Në mbledhjen e shtabit të emergjencave në këtë bashki, njofton se situata aktualisht është normale ndërsa problematike shfaqet në Sukth, Katund i Ri, Ishëm dhe Rrashbull.