I martuar me fëmijë mashtron vajzën nga fshati/’Nusja e tij erdhi në shtëpi, u largova shtatzënë’

12 Maj 2022, 18:44 | Përditesimi i fundit: 2022-05-12 21:15:10

Një tjetër histori e dhimbshme vjen këtë pasdite në emisionin “Pa Gjurmë”. Është jeta plot mund e sakrifica e një 42-vjeçareje, e cila sot është nënë e dy fëmijëve të mitur. Klodiana Balliu nga qyteti i Pogradecit, u njoh në fund të vitit 2013 me Ardian Canon, me të cilin nuk bëri kurrë celebrim. Edhe pse ajo e pranoi këtë gjë, nuk do ta kishte menduar arsyen e vërtetë pse bashkëjetuesi i saj nuk donte që kjo martesë të njihej ligjërisht. Pak muaj pasi u martuan, për 42-vjeçaren lindën edhe dyshimet e para, mirëpo shumë shpejt dyshimeve të saj u erdhi fundi. Nuses së re iu shemb bota kur në derë u shfaq një tjetër grua me dy fëmijë të rritur. Me ardhjen e tyre ajo zbuloi të vërtetën e burrit me të cilin kishte vendosur të lidhte jetën. Edhe arsyen e refuzimit për të bërë celebrimin e zbuloi nga ai moment. Ardiani ishte i martuar dhe baba i një djali 17 vjeç dhe një vajzë 12 vjeçe. Partneri kishte tentuar t’ia fshihte të shkuarën, ndërsa vënë përballë këtij fakti Klodiana vendos të kthehet tek shtëpia e prindërit të saj, aty ku mori një tjetër refuzim. Duke mos pasur asnjë mundësi tjetër ajo kthehet sërish tek Ardiani, duke pranuar në të njëjtën shtëpi edhe bashkëshorten e tij legjitime. 8 muaj në vijim çdo ditë ishte një betejë, për 42-vjeçaren e cila përballej me grindjet e vazhdueshme, si dhe me kërkesën e gruas që kërkonte pjesën e saj në atë shtëpi. Me dy gra në një shtëpi, Ardiani vendos të emigrojë drejt Greqisë, ndërsa Klodiana kishte mbetur shtatzënë. Ajo i kërkoi të zgjidhte mes saj dhe bashkëshortes së parë, mirëpo ai zgjodhi të largohej. Edhe Klodiana zhvendoset në Tiranë, aty ku vendos të nisë një tjetër jetë, me një tjetër partner. Me Hekuranin u njoh në vitin 2017 dhe sëbashku emigruan drejt Greqisë. Për 42-vjeçaren historia përsëritet. Shtazënë për herë të dytë bashkëjetuesi i saj pëson infarkt ndërsa dërgohet me urgjencë në një spital grek. Ky do të ishte edhe momenti i fundit që do ta shihte Hekuranin me të cilin ka 4 vite pa patur asnjë kontakt. Në mungesë të dokumentave Klodiana kthehet nga autoritetet greke në Shqipëri, ku vjen në jetë vajza. E mbetur e vetme me dy fëmijë të mitur, ku asnjë prej tyre nuk njeh babain biologjik, kjo nënë kërkon ndihmë.