Kanali i La Manshit u kthye në kryefjalën e muajve të fundit përsa u takon dyndjes së emigrantëve mes tyre mjaft shqiptarë të cilët paguanin shuma të mëdha në euro për të kaluar nga Franca drejt brigjeve të Anglisë. Ky emigrim i paligjshëm i shqiptarëve, përgjatë vitit 2022 që shkaktoi debat politik, madje edhe ndërkombëtar nuk i ndali të rinjtë shqiptarë të realizonin endrrën. Mes tyre ishte edhe i riu shqiptar nga Hasi i Kukësit, Elton Ahmataj i cili sëbashku me disa djem të tjerë u nisën drejt Francës me destinacion Anglinë më 30 gusht të vitit 2022. Për pagesën e transportit ilegal me gomone ai mori me vete 350 euro, ndërsa pjesa tjetër do të paguhej nga i vëllai i cili e priste në Angli. Dy ditë më pas, Eltoni telefonoi babain ku e njoftonte se kishte mbërritur në Francë dhe do të udhëtonte drejt Anglisë, por telefonata u shkëput…Me numrin e një shokut i biri telefonon të atin duke i thënë:“Babi nuk shkuam dot në Angli, na u ça gomonia rrugës, shpëtuam, na nxorri policia franceze në tokë të thatë…”Një tragjedi ishte shmangur nga marina franceze në ditët e para të muajit shtator 2022. Në një gomone ku ndodheshin mbi 50 shtetas të huaj dhe shqiptarë ishte edhe 24-vjeçari Elton Ahmataj. Në komunikimin me babain e tij, ai e njoftoi se gjatë momentit të shpëtimit kishte humbur në ujë të gjitha sendet personale dhe se kishte nevojë për para. I vëllai nga Anglia i nis 200 euro ndërsa pas këtij momenti, Eltoni humb gjurmët dhe çdo komunikim me të afërmit e tij nga Calais, ku ndodhej në atë kohë. Afro një muaj më pas më 2 tetor të vitit 2022, në familjen Ahmataj mbërrin një zarf nga Franca, ku shkruhej:“Babi a jeni mirë? Unë jam mirë, jam në burg në Francë, nuk e di sa do më mbajnë se thonë se kam një gjyq në datë 31. Ndoshta më mbajnë disa muaj ose më kthejnë. Këtë s’e di, telefon për të folur nuk japin. Jam mirë mos u mërzisni se të shkruaj për çdo gjë”. Sipas babait shkrimi në letrën e bardhë është i Eltonit, ndërsa z.Sahit veç denoncimit në polici, nuk ka mundur dot të bjerë në gjurmët e djalit, pasi nuk ka informacion mbi vendin ku ai mbahet i izoluar nga autoritetet franceze, ndaj sot kërkon ndihmën e emisionit “Pa Gjurmë”…