Shpesh trupi ynë flet shumë përpara se një sëmundje të diagnostikohet. Një lodhje që zgjat, pagjumësia, ndryshimet e humorit, djersitja natën, rrahjet e forta të zemrës apo edhe dëshirat e papritura për ushqime të caktuara, janë sinjale që ne i konsiderojmë normale, stres apo thjesht kalimtare. Por në shumë raste, ato janë mënyra se si organizmi përpiqet të na paralajmërojë se diçka nuk po shkon siç duhet. Në ritmin e shpejtë të jetës moderne, njerëzit po humbin gjithnjë e më shumë aftësinë për të dëgjuar trupin e tyre. Ne mësohemi të heshtim simptomat me kafe, ilaçe, stres apo mungesë kohe, pa kuptuar se trupi nuk gabon kurrë kur jep sinjale. Por a i jep trupi të njëjtat shenja tek gratë dhe burrat për të njëjtën sëmundje? Pse disa simptoma shfaqen vetëm gjatë natës? Dhe cilat janë ato shenja të çuditshme e të nënvlerësuara që mund të lidhen me probleme hormonale, mungesa vitaminash, inflamacion apo edhe sëmundje më serioze? Për të folur më shumë mbi këtë temë kaq të rëndësishme për shëndetin dhe ndërgjegjësimin tonë, flasim në “Rreze Dielli” me nutricionistin Altin Joka, ekspert i mjekësisë holistike, me të cilin do të kuptojmë më mirë gjuhën që përdor trupi për të na paralajmëruar.