Kronikë

Reshjet e dëborës kanë zbritur edhe në zonat e ulëta. Tirana është zbardhur në orët e para të mëngjesit, por reshjet kanë qenë me intensitet të dobët. Rruga e Kombit është bllokuar dhe në të janë regjistruar edhe 2 aksidente, pa të plagosur. Borë ka rënë edhe në Elbasan, Shkodër e Gjirokastër si dhe janë rikthyer në Korçë, Kukës dhe Dibër ku raportohen disa fshatra të bllokuara. 4 aksidente pa të plagosur janë regjistruar edhe në aksin Qukës-Qafë Thanë. Izolohet edhe Dardha në Korçë. Pezullohet mësimi nga moti i keq në Gjirokastër, Pukë, Fushë Arrëz si dhe në disa shkolla të Korçës. Probleme me energjinë elektrike në Berat.

Nga ana tjetër, ditën e sotme, Kolegji i Posaçëm i Apelimit do të shqyrtojë çështjen e gjyqtarit Artan Laze, i cili është shkarkuar në korrik të 2017 nga Komisioni i Pavarur i Kualifikimit për probleme me pasurinë.

Shtypi i ditës për sot, e mërkurë, 9 janar 2018, titujt e gazetave kryesore në vend.

Nga

Elton Qyno

Më 1 janar i është vënë tritol në banesë Vladimir Mulajt pranë Qytetit Studenti. Policia e Tiranës asnjë informacion për ngjarjen. E motra, Natasha Mulaj drejton Kolegjin e Apelimit që vendos përfundimisht për fatin e çdo prokurori dhe gjyqtari.

Gjyqtari i Fierit Roland Hysi i kërkon seks për t’i dhënë kujdestarinë e fëmijës. Po kështu zonja i jep psikologes 500 euro për Hysin, duke i premtuar edhe 500 euro të tjera në mbyllje të gjyqit.

Pas 66 ditëve protestë te Unaza e Re, një pjesë e banorëve mbrëmjen e sotme janë drejtuar te shtëpia e kryeministrit Edi Rama në Surrel duke protestuar për rreth 20 minuta. Ata kërkojnë anulimin e projektit.

Tre kompani medikamentesh, njëra me seli në Tiranë, janë goditur nga policia italiane për mashtrim fiskal. Sipas mediave italiane, medikamentet bliheshin fillimisht me çmim mjaft të lirë nga Pakistani dhe Kina dhe më pas shiteshin në vendin fqinj me vlerë të dyfishuar monetare. 

Delegacioni i BE-së në Tiranë fton të gjithë prokurorët që të aplikojnë për t’u bërë pjesë e kësaj strukture kyçe për të luftuar korrupsionin në Shqipëri.

Policia Bashkiake dhe Shërbimi Social i Bashkisë Tiranë po monitorojnë nga afër situatën në gjithë territorin duke u ofruar ndihmë dhe strehuar të gjithë personat që gjenden në vështirësi, siç janë edhe endacakët.

Tre shqiptarë, dy prej të cilëve njihen për precedentë penalë në Itali, janë vendosur nën hetim nga policia për shkak të mundësisë së përfshirjes së tyre në mafien famëkeqe “Sacra Corona Unita”.

Sipas njoftimit të ministrisë, strukturat përkatëse pranë universiteteve publike janë angazhuar për të mundësuar brenda datës 11.01.2019 gjithë informacionin e nevojshëm. Pas kësaj date, ministria thekson se do të lëvrohet fondi për universitetet.

Kryebashkiaku Sotiraq Filo në një lidhje telefonike në edicionin qendror të lajmeve në Report Tv thotë se janë marrë të gjitha masat që ngrohja të mos mungojë, ndërsa shton se duke filluar nga nesër mësimi do të fillojë në orën 09:00 në Korçë.

Arqipeshkëvi i Metropolit të Shkodrës, Angelo Massafra, i ka dërguar më datë 3 janar një letër Kuvendit të Republikës, ku i drejtohet deputetëve për një shërbim politik të bazuar në dimension paqësor e jashtë kontekstit të korrupsionit.

Projekti i Unazës së Re prek mbi 300 banesa, një pjesë e të cilave janë me leje dhe do të marrin dëmshpërblim të plotë, ndërsa pjesa tjetër që i kanë shtëpitë pa leje nuk do të përfitojnë.

Argjendaria “Altınbaş” në City Park ka rënë pre e grabitjes, ndërsa vlera e bizhuterive që janë marrë llogaritet më shumë se 200 mijë euro. Autorët kanë arritur që të neutralizojnë rojet dhe më pas kanë hyrë brenda duke thyer xhamin e derës dhe marrë bizhuteritë. Report Tv ka siguruar pamjet e argjendarisë. Pronarët e argjendarisë janë Abdulla Frakulli dhe Ibrahim Çaushi.

Një 67 -vjeçar ka mbetur i plagosur rëndë, pasi një aksidenti të ndodhur pasditen e kësaj të marte në aksin Lezhë-Laç ku teksa po udhëtonte me biçikletë është përplasur nga një furgon.

Kryetari i Gjykatës së Shkodrës Arben Zefi duket se rrezikon shkarkimin nga Komisioni i Pavarur i Kualifikimit. Bazuar në hetimet e ILDKPI-së dhe DSIK-së, subjekti rezulton se: nuk ka deklaruar të ardhurat për blerjen e një apartamenti në Shkodër dhe të dy makinave, ka liruar nga burgu një person gjatë kohës në detyrë dhe se mban kontakte të papërshtatshme. 

Autoriteti Rrugor Shqiptar ka njoftuar drejtuesit e mjeteve që në segmentet Librazhd-Korçë-Kapshticë dhe Korçë-Ersekë të marrin masa paraprake për qarkullimin e tyre, si gomat dimërore apo zinxhirë.