Një nënë 48-vjeçare është në kërkim të djalit të saj. Miranda Sulaj i drejtohet me një mesazh të birit pasi ka 7 vite pa e parë me sy. Majkëll erdhi në jetë nga martesa e saj e parë me Ardian Rryqin. Cifti pati emigruar në Itali që prej vitit 1991 ndërsa jetuan për shumë kohë në Brindisi. Miranda u bë nënë në një moshë mjaft të re, por gëzimi i saj i parë në jetë do ta linte me kokën pas. Pas qëndrimit të saj prej dy vitesh në Itali nëna bashkë me djalin kthehet në Shqipëri. Me kthimin e saj në atdhe ndryshon gjithcka në marrëdhënien mes ciftit. Ajo fillimisht vendos të jetojë te prindërit e bashkëshortit, në Tepelenë por marrëdhënia me ta nuk ishte e mirë. Letrat që Ardiani i dërgonte Mirandës i mbaheshin të fshehta nuses së djalit, duke i mohuar shpesh komunikimin me të. Pak muaj më pas ajo kthehet tek shtëpia e prindërve të saj, duke i dhënë fund martesës me Ardianin, i cili jetonte ende në Itali. Gruaja me një djalë të mitur njihet me tjetër djalë me të cilin nis bashkëjetesën. Me bashkëshortin e dytë ajo u njoh me shkuesi në vitin 1994. Ashtu sikundër edhe ajo, ai vinte nga një martesë tjetër. Me ardhjen në jetë të një vajze, burri ndryshoi sjellje dhe shkak ishte djali që Miranda kishte nga martesa e saj e parë. Në Shqipëri mbërrin babai biologjik i Majkëllit dhe pas divorcit me 46-vjecaren, në dakordësi mes palëve u pranua që vogëlushi të jetojë me babain e tij. Ajo ditë kur nëna lë djalin 4-vjeçar dhe largohet te familja e saj e re, ishte dita më e dhimbshme për të. Pas kësaj ndarje, hera e parë që ajo e kërkoi të takohej me të birin ishte viti 1998, por ish-vjehrri e dëboi nga banesa. Nga ai moment kaluan 10 vite me radhë kur ajo do të ritakohej me të birin. Edhe pse për të ishte një nga momentet më të lumtura, ftohtësia nga ana e Majkëllit e hidhëroi edhe më shumë. Edhe pse jetonin në të njëjtin qytet u panë rrallë. E fundit herë që Miranda pa me sy të birin që tashmë është bërë burrë ishte viti 2015, kur Majkëlli punonte në një supermarket në Levan. Sot Miranda është nënë e tre fëmijëve, por vjen të kërkojë ndihmë në emisionin “Pa Gjurmë’, me një mesazh prekës jo vetëm për gabimet e së shkuarës, por me shpresën se do mund rilidh kontaktet me djalin pas 7 viteve.