Shpëtim Pasho kishte emigruar drejt Italisë që në fillim të viteve ’90. Në vitin 2001 ai m,err me vete edhe bashkëshorten Teuta dhe fëmijët. Për shkak të krizës ekonomike, në vitin 2010 Shpëtimi dhe Teuta u rikthyen në shtëpinë e tyre në Vlorë. Ata shkonin çdo tre muaj në Itali për të bërë kontrolle shëndetësore meqënëse kishin probleme me diabetin dhe tensionin e lartë. Në datën 2 nëntor 2015 ata shkuan sërish në Itali për kontroll mjeksor dhe qëndruan tek shtëpia e të dashurës së djalit të tyre në Castelfiorentino të Firences. Mjekët u rekomanduan që të shtroheshin një javë në spital për të stabilizuar gjendjen e tyre shëndetësore. Në datën 1 nëntor 2015, Teuta ka folur me të motrën në telefon dhe sipas saj çdo gjë dukej në rregull me të dy. Një ditë më pas, më 2 nëntor ata nuk përgjigjeshin më në telefon dhe ishin larguar edhe nga shtëpia ku qëndronin. Fillimisht fëmijët mendonin se prindërit e tyre mund të ishin larguar drejt Shqipërisë por nuk rezultoi një gjë e tillë. Thuhet se ata kanë patur debate me të dashurën e djalit të tyre, ndërkohë që ky i fundit nuk ka qenë gjatë atyre ditëve në shtëpi. Fëmijët e kanë denoncuar humbjen e prindërve në policinë italiane të cilët pas verifikimeve që kanë bërë kanë dalë në konkluzionin që “Shpëtim dhe Teuta Pasho janë larguar me vullentin e tyre si rezultat i problemeve familjare”. Policia ende nuk ka një pistë që mund t’i çojë drejt zbulimit të vendndodhjes së tyre. Nga publikimi në emisionin “Chi l’ha visto” në Rai 3, familjarëve i’u tha se kishin ardhur informacione nga Xhenova por si përfundim asgjë konkrete. Megjithse ndonjëherë kanë patur debate, siç ndodh në shumë familje, fëmijët thonë se duke i njohur prindërit ata nuk do largoheshin kurrë me vullnet të lirë apo të fshiheshin prej tyre. Për këtë arsye të afërmit i druhen më të keqes dhe me ankth presin çdo ditë një lajm prej tyre.