Kronikë

Një aksident rrugor është shënuar këtë të enjte në  aksin Librazhd-Elbasan, ku një autobot ka dalë nga rruga e për pasojë është përplasur me një shkëmb në anë të rrugës.

Gjatë takimit të zhvilluar sot Senati i UT i ka kërkuar rektorit Mynyr Koni të japë dorëheqjen pasi po shkel ligjin duke mos i dhënë zgjidhje ngërçit të krijuar në disa fakultete ku një grup studentësh kanë uzurpuar auditoret. Mirëpo në një reagim për mediat, Koni shprehet se në mbledhje nuk është kërkuar dorëheqja e tij, ndërsa nga ana tjetër pranopn se studentët kërkuan rinisjen e procesit mësimor. 

Në një kohë kur stomatologët kanë vendosur të rrisin 100% çmimet e shërbimet dentareve në vend, Partia Demokratike ka reaguar duke akuzuar për këtë vendim edhe qeverinë. Sipas kësaj force politike, qeveria është përgjegjëse pasi ka heshtur pas këtij urdhri të paligjshëm, korruptiv dhe abuziv. 

Zv.ministrja e Brendshme Voda priti në një takim zyrtar Drejtorin e Zyrës së të Huajve në Belgjikë, Roosemont, ku temë qëndrore diskutimi ishte thellimi i bashkëpunimit për të parandaluar e frenuar fenomenin e azilkërkërkuesve dhe emigracionit të paligjshëm të shtetasve shqiptarë në Belgjikë.

Në spitalin e Elbasanit është vendosur një rezonancë e re e cila i ka kushtuar buxhetit të shtetit 770 mijë dollarë. Rama e vizitoi spitalin bashkë me ministren e Shëndetësisë, teksa u shpreh se ky investim e shkurton pritjen në radhë për marrjen e këtij shërbimi.

Nga

Piro Nase

Prova që mbante Erigers Mihasin pas hekurave, ishin shenjat e tij të gishtërinjve në automjetin që u përdor për grabitjen e shtëpisë së Çiços. Ai u zbulua gjatë hetimeve për përplasjen me armë në ish-bllok, pasi njihej si mik me Ervis Martinajn dhe është shoqëruar për t'u marrë në pyetje. Sot Gjykata e Gjirokastrës vendosi masën e arrestit burg pa afat për Mihasin. Elton Çiço u vra në prill 2016 në Tiranë.

Protestës së banorëve të Zagorisë i është përgjigjur drejtori i kompanisë naftënxjerrëse SHELL në Shqipëri, Rohan D'Souza është shprehur kompania nuk do të kryejë kërkime në këtë zonë. Më herët reagoi kryeministri Edi Rama i cili u shpreh me fjalët se "një gjë e tillë nuk bën vaki".

Kreu i përgjithshëm i Hipotekave, Valdrin Pjetri ka deklaruar për mediat këtë të enjte se sasia dhe cilësia e shërbimeve të ofruara tek qytetarët është rritur ndjeshëm gjatë vitit 2018.

Në mbledhjen e zhvilluar në Rektoratin e Tiranës u diskutua për problematikat e Fakultetit të Drejtësisë. Një grup i vogël studentësh imponojnë pjesër tjetër të studentëve të mos bëjnë mësim duke bllokuar dhe hyrjen e ambientet e fakultetit.

Policia e Lezhës ka arrestuar dy persona. Bëhet fjalë për: B.B. 29 vjeç dhe I.L. 24 vjeç, nga Tirana. Në bashkëpunim me njëri-tjetrin ata kanë mashtruar 4 shtetas që vinin nga vendet e treta për kalim të paligjshëm të kufirit.

Vdes në mënyrë misterioze turku Nejdet Cesuroglu, i kërkuar nga policia si importuesi i heroinës që përpunohej në laboratorin e Hasit. Trupi i pajetë u gjet në një banesë në Prishtinë, ku u arrestuan edhe dy bashkëpunëtorët e tij. Vdekja e tij konsiderohet misterioze pasi ende nuk dihet nëse është vrarë apo ka ndërruar jetë për arsye shëndetësore. Dy të arrestuarit dhe turku janë filmuar në hotelin e biznesmenit Admir Hoxha, i shpallur në kërkim si ideatori i laboratorit.